ຄູ່ມືການດໍາລົງຊີວິດໃນເກົາຫລີ

ລັດຖະບານເກົາຫຼີ ແລະອົງການພາກເອກະຊົນໄດ້ສະໜອງຫຼາກຫຼາຍການບໍລິການເພື່ອຊ່ວຍເຫຼືອການດຳເນີນຊີວິດຂອງເຂົາເຈົ້າໃນປະເທດເກົາຫຼີ ເຊັ່ນວ່າ ການສອນພາສາເກົາຫຼີ, ການສອນວັດທະນະທໍາເກົາຫຼີ, ການໃຫ້ຄໍາປຶກສາ ແລະອື່ນໆ. ໂດຍສະເພາະແລ້ວ, ການໃຊ້ການບໍລິການຕ່າງໆຜ່ານບັນດາອົງການໃຫ້ຄວາມຊ່ວຍເຫຼືອຄອບຄົວຫຼາຍວັດທະນະທໍາ ແລະຄົນຕ່າງຊາດແມ່ນເປັນປະໂຫຍດຫຼາຍສຳລັບຄົນຕ່າງຊາດຜູ້ທີ່ຫາກໍ່ມາເຖິງເກົາຫຼີ ແລະມີຄວາມຫຍຸ້ງຍາກໃນການສື່ສານ ແລະຮັກສາຄວາມສຳພັນກັບຄົນເກົາຫຼີ ເນື່ອງຈາກບໍ່ຄຸ້ນເຄີຍກັບວັດທະນະທໍາຂອງເກົາຫຼີນັ້ນເອງ.

ການຮຽນສາພາສາເກົາຫຼີ ເປັນສິ່ງທີ່ຈຳເປັນ ເພື່ອທຳຄວາມເຂົ້າໃຈວັດທະນະທຳເກົາຫຼີ ແລະ ວິຖີຊີວິດໃນເກົາຫຼີ. ຢູ່ໃນເກົາຫຼີ ມີຫຼາຍອົງການຈັດຕັ້ງ ທີ່ບໍລິການສອນພາສາເກົາຫຼີ ສຳລັບຄົນຕ່າງປະເທດ ໂດຍບໍ່ເກັບຄ່າ. ບັນດາສູນຊ່ວຍເຫຼືອຄອບຄົວ ຫຼາຍວັດທະນະທໍາ, ສູນຊ່ວຍເຫຼືອຄົນເຂົ້າເມືອງເກົາຫຼີ ແລະໂຮງຮຽນສອນພາສາເກົາຫຼີ ແມ່ນອົງການຈັດຕັ້ງອັນດັບຕົ້ນໆທີ່ໃຫ້ການສອນພາສາເກົາຫຼີແກ່ຜູ້ຢູ່ອາໄສຊາວຕ່າງຊາດ. ສູນຊ່ວຍເຫຼືອຄອບຄົວຫຼາຍວັດທະນະທໍາຍັງດຳເນີນໂຄງການໃຫ້ການສຶກສາແບບເຖິງຕົວ ເຊິ່ງຄູສອນພາສາເກົາຫຼີຈະຖືກສົ່ງໄປສອນພາສາເຖິງເຮືອນຂອງຄົນຕ່າງຊາດທີ່ມາຢູ່ໃນເກົາຫຼີຫຼັງແຕ່ງງານ. ດ້ວຍຈຳນວນໂຄງການສອນພາສາເກົາຫຼີທີ່ສະໜອງໃຫ້ນັບມື້ນັບເພີ່ມຂຶ້ນ, ຜູ້ຢູ່ອາໄສຊາວຕ່າງຊາດສາມາດຮຽນຮູ້ພາສາເກົາຫຼີຢູ່ກັບເຮືອນໄດ້ຢ່າງງ່າຍດາຍ.

ໂຄງການສອນວັດທະນະທໍາເກົາຫຼີ ແລະ ການໃຊ້ຊີວິດໃນເກົາຫຼີມີຈຸດປະສົງເພື່ອຊ່ວຍໃຫ້ຊາວຕ່າງຊາດສາມາດເອົາຊະນະອຸ ປະສັກໃນການໃຊ້ຊີວິດໃນເກົາຫຼີອັນເປັນຜົນມາຈາກຄວາມແຕກຕ່າງດ້ານວັດທະນະທໍາ ແລະ ວິຖີຊີວິດ. ພວກເຮົາມີແຜນການ ແລະ ຄູທີ່ມີປະສົບການທີ່ທຸ້ມເທການສອນເພື່ອໃຫ້ຄົນຕ່າງຊາດເຂົ້າໃຈກ່ຽວກັບການໃຊ້ຊີວິດແບບຫຼາຍວັດທະນະທໍາ, ກົດໝາຍ, ສິດທິມະນຸດ, ການແຕ່ງງານ, ຄອບຄົວ ແລະການປັບຕົວເຂົ້າກັບສັງຄົມຂອງເກົາຫຼີ.

ຄອບຄົວເກົາຫຼີສ່ວນໃຫຍ່ໃຊ້ຄອມພິວເຕີ ແລະເກົາຫຼີມີເຄືອຂ່າຍອິນເຕີເນັດທີ່ທັນສະໄໝຫຼາຍ. ຜູ້ໃຊ້ສາມາດໄດ້ຮັບຂໍ້ມູນທີ່ຫຼາກຫຼາຍຈາກການໃຊ້ອິນເຕີເນັດ ແລະໃຊ້ການບໍລິການອອນລາຍທີ່ຫຼາກຫຼາຍໄດ້ຢ່າງສະດວກສະບາຍ ເຊັ່ນວ່າ ລະບົບທະນາຄານຜ່ານອິນເຕີເນັດ ແລະການບໍລິການດ້ານບໍລິຫານອື່ນ. ສະນັ້ນ ຫຼາຍໆອົງການ ລວມທັງ ສູນຊ່ວຍເຫຼືອຄອບຄົວຫຼາຍວັດທະນະທໍາ ແລະສູນຊ່ວຍເຫຼືອຄົນເຂົ້າເມືອງເກົາຫຼີ ມີໂຄງການສອນໄອຊີທີ ເພື່ອເຮັດໃຫ້ຜູ້ຢູ່ອາໄສຊາວຕ່າງຊາດສາມາດຮຽນຮູ້ວິທີຄົ້ນຫາຂໍ້ມູນຜ່ານອິນເຕີເນັດ, ແລະວິທີໃຊ້ແອັບພລິເຄຊັນທີ່ຫຼາກຫຼາຍ.

ການບໍລິການໃຫ້ຄໍາປຶກສາມີຈຸດປະສົງຊ່ວຍໃຫ້ຜູ້ຢູ່ອາໄສຊາວຕ່າງຊາດທີ່ປະສົບກັບຄວາມຫຍຸ້ງຍາກໃນເກົາຫຼີ, ໂດຍການສະ ໜອງຄໍາແນະນໍາທີ່ພວກເຂົາຕ້ອງການເພື່ອແກ້ໄຂບັນຫາຂອງເຂົາເຈົ້າ. (ບັນຫາຄອບຄົວ, ແຮງງານ, ບ່ອນຢູ່ອາໄສ ແລະກົດໝາຍ)