Aklat-pamatnubay sa Paninirahan sa Korea

Ikinatutuwa ng mga Koreano ang pagbabahagi ng mga pagkain sa kanilang mga kapamilya at kaibigan. Kaya naman kapag maghahain sila ng pagkain para sa mga bisita, pinaghahandaan nila ito nang mabuti upang higit na mas masarap na pagkain ang maibigay nila. Sa pangkalahatan, ang isang “meal” sa Korea ay binubuo ng kanin, sabaw at mga side dish. Kagaya ng sabaw, may iba’t ibang uri din ng ulam gaya ng stew, mga side dish na gawa sa gulay at mayroon ding mga pinasingawang (steamed) pagkain, mga nilagang pagkain, inihaw, pinirito at iba pa. Ang pinakakilalang side dish sa Korea ay ang “kimchi.” Bilang pamalit sa kanin, kumakain din sila ng mainit o malamig na noodles, kakanin (“tteok”) at iba pa. Unti-unting dumadami ang bilang ng mga mag-asawang may trabaho (working-parents) kaya naman nagiiba din ang stilo ng pamumuhay ng pamilya na kung saan dumadami ang pang-isahang pagkain, simple at madaling lutuin, at mga pahatid na pagkain (delivery foods).

Kumpara sa kanin sa Timog Silang Asya, higit na mas malagkit ang kanin sa Korea. Maaaring mahirapan ang mga hindi sanay kumain nito at maaaring hindi matunawan nang mabuti. Mga isang linggo ang kailangan upang masanay sa pagkain ng kanin.

Ang apat na uri ng lutuing sabaw ay ginagawa sa pamamagitan ng pagpapakulo ng gulay, karne o isda sa tubig. Ang tawag sa bawat lutuing sabaw ay iba-iba depende sa kung anong sangkap ang ginamit at kung paano ito iniluto : ○○ kuk, ○○ t’ang, ○○ jjige, ○○jeon-gol.

Ang “kimchi” ang pinakamahalaga at hindi mawawalang pagkain sa bawat hapag-kainan ng mga Koreano. Taglay nito ang balanseng elemento ng panlasa, nutrisyon at kalidad sa pag-iimbak (storage quality). Ginagawa ang kimchi sa pamamagitan ng pagbuburo sa mga gulay (labanos, repolyo, pepino, atbp.) sa asin at saka ito hahaluan ng mga pampalasang gawa sa sili, bawang, dahon ng sibuyas (green onions), luya, binurong isda, at iba pang mga sangkap. Bago ito kainin kailangan muna itong i-ferment sa tamang temperatura sa loob ng mahaba-habang panahon. Mahirap magtanim ng repolyo kapag panahon ng taglamig, kaya gumagawa sila ng maramihang Kimchi mula Nobyembre~Disyembre bilang paghahanda sa winter. Ito ang tinatawag nilang “Kimjang,” kung saan magkakasama ang mga magkakamag-anak sa paggawa ng kimchi.

Ang Korea ay isang bansa na may tiyak na 4 na panahon: tagsibol, tag-init, taglagas, at taglamig. Kaya, maraming masasarap na prutas sa bawat panahon. Gayunpaman, sa kasalukuyan, posible na ang pagtatanim ng mga prutas sa loob ng vinyl greenhouses. Kaya naman maaari nang makatikim ng mga prutas sa buong taon kahit ano pa man ang panahon. Pero siyempre, higit na mas masarap pa rin ang napapanahong prutas (season fruits). Kung gusto mong kumain ng mga prutas na iyong kinakain sa iyong bansa, pwede kang bumili sa supermarket o department store.